بهمن 1381

بيزيم آدلي ـ سانلي زنجان ولايتيميزين ارکي و افتخاري ، ايراندا و دونيادا ، سايسيز و سونسوز دور. شيخ شهاب الدين سؤهره وئردي نين آدي بير اؤلکه يه کفايت ائدر ، آمما اونون يانيندا اونودولمامالي دير کي بو بؤلکه ده ، علامه حلّي کيمي عاليملر تربيت قيليبلار. بو بؤلکه سكگيزينجي يوز ايلده ، دونيا اوزوگونون قاشي ايميش. آوروپا ياتان چاغدا بورادا كرباسيه يه آدلانان سيار بيلي يوردو يولا دوشموشدو. همين زنجان ولايتيندن ميانالي عين القضات همداني ، علامه حلي ، شيخ شهاب الدين سؤهره وئردي ، نظام الدين مراغي ، نفائس الفنون صاحيبي محمد آملي و خواجه ي اعظم رشيد الدين کيمي عاليملر ، بيلگي ذيروه لرينه يوکسلديلر. هجري 710 ـ نجو ايلده ‏، «وصاف الحضره» ، سلطانيه ني «بئشينجي جنت» آدلانديرير نه ايچون كي بو عصيرده دونيانين ان بؤيوك تجاري ـ علمي شهري ايدي. او عصيرده ، بورادا دارالقانون ، دارالشفا ، دارالقرآن ، دارالضيافه ، دارالسياده ، دارالحديث و دارالعلم تيكيلميشدي. سلطان محمد خدابنده نين قبيري ده همين مجموعه ده يئرله شيب. علامه حلي ايكي ده يرلي «نهج الحق» و «منهاج الكرامه» كيتابلاريني بورادا يازدي. همين علامه حلي نين آدليم اوغلو ، «فخرالمحققين»ده بورادا درس اوخويوب 10 ياشيندا مجتهد اولوب بورادا تدريسه مشغول اولدو. زنجان شهريندن «عزالدين ابوالمعالي عبدالوهاب زنجاني» دونيايا گؤز آچير كي اونون «التصريف» اثري قرنلر بويو دور كي علميه حوزه لرينده تدريس اولونور. آنجاق زنجان ولايتينين افتخارلاري نه سايا گلر نه سانا.

بو نسيلدن قالانلاردان بيريسي ، «حکيم هيدجي» يه آدلانان «ملا محمدعلي هيدجي» دير. جرأتله دئمك اولار هئچ كيمسه تاريخدن بئله آدليم اولاراق مظلوم و ايتگين اولماييب. هيدجي ني هامي تانييارکن تانيمير. آدين ائشيدرکن آرتيغراق بيلمير. بو عاليم ، يوز اللي ايل اؤنجه ، زنجانين 60 کيلومتيرليگينده يئرله شن «هيدج» کندينده آنادان دونيايا گؤز آچدي.

«حکيم هيدجي» ايللر بويو ، آنا يوردوندان اوزاق دوشرکن ، شعرينده آنا يوردوسوندان حسرتله آد آپارير. او ، حافيظه سؤز آتاراق ، هيدجي شيرازدان گؤزل بيلير:

اولار کي وصف ائله ييبلر صفاده شيرازي        منه گومان يوخو ترجيح ، هيدجه شيراز

باغدان ايراق دوشوب قفسده محبوس اولان بولبول تک بئله نيسگيلله نير:

آي! خمسه نين اول سويوق سولاري        به! هيدجين اول سرين سولاري

«حکيم» ، ايلک تحصيلين هيدجده سونا چاتديراندان سونرا ، 25 ياشيندا قزوينه گئديب 5-4 ايل حسن خان ـ حسين خان مدرسه سينده درس اوخويوب فقه و اصولون اورادا اؤيرندي. آزجا تهرانا گئديب اورادان 10 ايلليک نجفه و کربلايا گئتدي. فلسفه ـ فقه ين اورادا اؤيرندي و40 ياشيندا تهرانا قاييتدي. «حکيم هيدجي» تهرانا گلنده ، ذيروه ده اولان يوکسک مقاملي بير فيلسوف ، فقيه ، اديب ، اصولچي ، منطقچي و شاعير ايدي. عؤمرونون سونوناجاق تهراندا ياشادي و«سيد نصرالدين» مدرسه سينده تدريسه مشغول اولدو و 76 ياشيندا دونيادان گؤز اؤرتدو.

اونا ، اؤز زامانيندا خئيلي علملره خصوصيله فلسفه يه مسلط اولماغي ايچون ، «حکيم» آد وئرميشديلر. «حکيم هيدجي» ، «زنوزي» کيمي ، اسلام دونياسينين بؤيوک فلسفه چيلريندن ساييلير کي باخيمي و يئريشي باشقالاريله فرق ائديردي. «مدرس تبريزي» اؤز ديرلي «ريحانه الادب» تذکره سينده ، 328 ـ ينجي صفحه ده ، اوندان آد آپارير. «مجتهدي» اؤز «رجال آذربايجان در عصر مشروطيت» کيتابيندا 182 ـ ينجي صفحه ده اونو ياد ائدير. «علي هشترودي» اونون 100 ايلليک آنادان اولماغينا گؤره ، تورکجه ـ فارسجا ديوانين 300 صفحه ده يايير.

«هيدجي» نين باشقا شاه اثرلريندن گؤز اؤرترکن ، يالنيز ديواني بيزيم الميزده قالسايدي دا و اونو يالنيز شاعير سانسايديق دا ، يئنه «حکيم هيدجي»نين آدي تاريخده قالماغا کفايت ائدردي. اونون 4000 بيتدن آرتيق ديواني ، فلسفي ، اخلاقي ، عرفاني ، سياسي دير. حکيمين 4000 بيتدن آرتيق ديواني ، اونون گئنيشلي علملرين و آيدين ذهنين و زمانه دن نئچه يوز ايل قاباقليغين گؤسترير. حکيم هيدجي ، بؤيوک شاعير ايميش. اونون دورلو ـ دورلو شعرلري ، غزل ، مثنوي ، رباعي ، مخمس ، ترجيع بند و ترکيب بند دن عبارت دير. او ، بؤيوک فيلسوف اولارکن ، درين دويغولو شاعير ايميش.

حکيم هيدجي نين ديگر اثرلريندن ، عربجه يازديغي درين ـ گئنيشلي فلسفي «شرح منظومه سبزواري» دير. باشقا اثري ، سياسي ـ اجتماعي «رساله دخانيه» دير. بو اثر نئچه دفعه تبريزده و تهراندا مشروطيت زامانيندا چاپ اولونموشدو. بو اثر ، تکليکجه بللي ائده بيلر کي: حکيم هيدجي ، مشروطيت دؤوره سينين مبارزلريندن ايميش. بو اثري اوخويان بئله سانار کي بونون يازيچيسي يالنيز بير بؤيوک مبارز شاعير ايميش. اونون شکايتي مملکتين وضعيندن و استعمارين دخالتيندن و مردمون فلاکتيندن بو کيتابين سطير ـ سطيرينده گؤرونور.

حکيم هيدجي ني درين دويغولار و اؤز خلوتينه گئدن و ائو بوجاغيندا اولان شاعيرلر ايچينده آختارارکن ، گرکدير کي اجتماع ايچينده و مردملا دردلشن و نيسگيلله نن و اونلاري قالخيزديران بير شاعير گؤرک و بو اضدادلي و نقيضلي صفت بو شاعيره خاص دير. او هم اقبال لاهوري تک اجتماعي و دوشونجه لي شاعيردير ، هم حافيظ کيمي عاريف دير. حکيم ، فردله جمعي و اؤزو ايله جامعه ني بير ـ بيريندن آيري بيلمير. اونون سياسي ـ اجتماعي باخيمي دا دويغو و احساسدان اوزاق دگيل. اوخوجونو احساسا آپاريب آمما يولو چئويرير و اوخوجونو متعالي و هدفلي يئره چاتديرير:

بو روزگار کئچر ، ياخشي روزگار گلر      کؤنول داريخما ، غم ائتمه کي غمگسار گلر

دومان دوتوب يئر اوزون ،گر ياغار هاوادان قار      کئچر گئدر بو سويوق قيش ، يئنه باهار گلر

تلسمه بو شه ين عهدينده گر ستم يئتيشير       بو شهريار گئدر ، آيري شهريار گلر  

او شاه کي دوشمنه ساتدي رعيتي گؤردون       يئنه اجل اوخونا سينه سي دوچار گلر

 

بئله ليکله بو قورخماز شاعير ، صراحتله ناصرالدين شاه دان عبرت آلماق ايسته يير و اونون باغليليغين انگيليز استعمارينا دئيير. سونرالار دا اونون اوغلو محمدعلي شاها و اونون تزار روسيه سينه باغليليغين بئله شعره چکير:

آلله بو شاهين بختي دؤنوب تختي دولانسين        مشکل ، بونون عهدينده دوداغي گولن اولسون

او ، اؤز سلفلري ، خاقاني و فضولي تک ، درباردان اوزاق گزيب و باشارديقجا دربارين فضاحتيندن دئيير. حکيم ، آزاد ياشايير و مال و منال بندينده دگيل. مال ايچون تملّقدان شعر دئمير. بلکه آزادليق و کيشيليک ايچون شعر دئمکدن ، ضررده گؤرر ، آمما يئنه باش اگمير:

منه ايران بو فضاسيله دؤنوبدور قفسه        منه تهران بو صفاسيله دؤنوب زندانه

حكيم هيدجي ، فارسجا شعرلرينده ده ، اؤز شعر قدرتيني بيلديرير. اونون بو مثنويسي معروف دور كي:

سزد گر كشم آه و آرم فسوس به ايران كه ويران شد از دست روس

كجايند شاهان با طبل و كوس  كه خواهند اين كين ايران ز روس

همان نامداران ايران زمين  كه از اين خسان باز جويند كين

 

حکيم ، تاريخده اولان باشقا دوشونجه لي لر تک ، اؤزونه سؤزداش و اؤرک داش تاپمير و بوندان ناله ائدير:

هاني او کس کي منيم حاليما يانا اوره گي
دؤزن بلايه منم هيدجي اگر گتيرم

 

هارا گئديم کيمه اؤز درديمي ائديم اظهار؟
بيانه حاليمي ، آغلار منه در و ديوار

اونون خئيلي شعرلري اخلاقي سؤزلر دير و ساده جه ديل ايله ديني ـ اخلاقي سؤزلري اوخوجويا اؤيره دير:

آنلا سؤزو ، دانيش ، دئمه هر يئرده هر سؤزو      اندازه قوي دانيشماغا ، توت آغزينين كونجو

اونون باخيمي ، جامعه نين طبقاتي اختلافينا منفي دير و «فقير»لردن ايسته يير کي «غني»لردن حاقلارين آلسينلار:

ياخشي اولسايدي فقر ، پس تانري        نه يه اؤز آديني قويوبدو غني؟

اونون بو ساده جه تکلّفسوز بيتلرينين يانيندا ، آغير دوشونجه لي بيتلري ده وار دير کي فلسفي شعرلرينه شاميل اولور. دانيلماز سؤز دور کي بو بيتلرين آغيرليغين ، گرکمز کي شاعيرين بيانيندان و ديليندن بيلک. بلکه اونو، فلسفه بحثلرينه مربوط بيلمه لي ييک. وحدت و كثرت ده بئله دانيشير:

واحيد اگر اولمايا ، اولمــاز عدد       ائيله مه ييب بو سؤزو بير كيمسه رد

هر عدده باخدي ، باخيب واحيده       بو سؤزو اولمــــــاز دئيه سن زاهيده

و باشقا طرفدن ، شيخ محمود شبستري نين بو بيتينه باخاق و بونلارين ايلگيليگين بيلك:

جهان را ديد امري اعتـــــباري         چو واحــد گشته در اعداد ســــــاري

دوكتور صديق کشف ائتديگي و يايديغي شيخ ولي شيرازينين گلشن رازينده ده بئله سؤز گلير:

جهاني گؤردو بيليش ياد ايچينده       كي واحيد گيبي دير اعـــداد ايچينده

حکيم هيدجي ، 50 ياشيندا «دانشنامه»ني نظمه چكدي. بو 2800 بيتليك مثنوي ‏، اخلاقي و عقيدتي اولاركن ، بير فلسفي مثنوي دير و اولماسايدي شيخ محمود شبستري نين گلشن رازي ‏، بو مثنوي ، اؤز نمونه سينده تايسيز اولاردي. باشقا باخيملا باخساق ، بو مثنوي ني گلشن رازدان يوكسك بيلمه لي ييك. نه ايچون كي دانشنامه نين تنوع و دورلولوغو و اونون پيغامي عاما و خاصا چوخ يوكسك مقاملي دير. دانشنامه فارسجا يازيليب آمما 200 بيته ياخين توركجه بيتلرده ايچينده وار دير. حكيم هيدجي ، اخلاقي بحثلرله ياناشي ، اولوسلارين و مذهبلرين عقيده لرين آراشديريب و اونلارين ايناملارينا و مذهبلرينه باخماياراق ، دوغرو سؤزلرين تحسين ائده رك قبول ائديب. بونلارلا بيرليكده ، بو حكيمين گؤزه گلن خصوصيتي بو ايميش كي اسلامين و شيعه نين عاليملرينين آدينا و سانينا باخماياراق ، نظر وئريب. حکيم ، دونيادا آدلانان ، اؤز بؤلكه داشي ، شيخ شهاب الدين سؤهره وئردي نين بو سؤزون نئجه احتراملا رد ائدير:

اگر چند فرمود شيخ شهـــــاب        كه گوهر چو آب است و هستي سراب

ولي راي اين مرد بسيـــــاردان         نبـــاشد پســـــــــنديده نزد مهـــان

ياخود باشقا يئرده ، ملاصدرانين نظرينده تناقض تاپير:

چنين گفت دانشور فارسي
بهر جاي با اين روان ، من منم
گر اين گفت او با شگفت است جفت

روان تو در پيري و كودكي
چه تن مايه است و روان روي او
اگر تن دگرگون شود اندكي

 

خودي با روان است بر هر كسي
چه باك ار دگر گونه گردد تنم
شگفت آنكه در جاي ديگر بگفت:
يكي شد تنت نيز باشد يكي
بود بود هر مايه از بود رو
ندارد زيان در خودي و يكي

ارواح تناسخينين نظرين بئله رد ائدير:

روان نيست گردنده از تن به تن      دو جان گرد نآيند در يك بدن

دانشنامه ده ، بو فلسفي و اخلاقي بحثرله ياناشي ، او كي اوخوجونو حيرته و تعجبه يئتيرير ، شاعيرين شعر قدرتي و اونون تسلطي تلميع صنعتينه دير. شاعير ، چوخ راحات ، بير حديثي ، بير حكايه ني ، بير مثلي نظمه چكيب. البته خئيلي بيتلرين ايچينده حديثلرين مفهومي و معناسي مستتر دير كي اونلاري آراشديرماق گرك دير. بو مثنوي دير كي فارس ديلينين افتخاري اولا بيلر. اوندا هئچ قوميتدن ، نژاددان ، ديلدن ، تحقيردن ، استهزادان خبر يوخ. بو نظم دير كي بيتلرينين سايينا و آزليغينا باخماياراق اونو شاهنامه آدلانديرا بيله ريك. ياخشيراق اولا بيلر بو دانشنامه ايله شاهنامه نين اوخشاييشلارين و فرقلرين آراشديراق.

«چالشماق ، چاريق ييرتار» مثلين ، تورك ديليندن بئله فارسجايا كؤچورور:

مكن پاره ، اي دل نموده بنفش!    پي روزي بخش گرديده ، كفش

ياخود علي حضرتلرينين بو حديثيندن نئجه اوخوجويا اخلاق اؤيره دير:

بويوردي علي ، اول خداونده ال     اساء العمل من اطــــــال الامل

اؤزوندن ائله آرزوني ايـــــراق      باشارسان اؤزون خلقدن چك ايراق

بونلاردان علاوه گرك حكيم هيدجي نين بير «كشكول» كيتابيندان آد آپاراق كي تاريخ سيز و آدسيز زنجاندا چاپ اولونموشدو و باشقا كشكوللار تك ، متفرقه علمي ـ ادبي سؤزلر ايدي. ايكي كيتابدا بو حكيمدن قمري1344ـ ينجي ايلده تهراندا چاپ اولونوب كي عبارت دير: «حاشيه بر لئالي منتظمه و شرح آن در منطق» ، «تعليقه بر غرر الفوائد در حكمت».

سؤزو ، حكيم هيدجي نين بير غزليله سونا چاتديريريق:

دوشدو بو گول اندامين تا باشيمه سئوداسي
بو شرخ و پريچهره ، آشوب ساليب شهره
بو دلبر بي مهرين ، آخر هوس عشقي
اول ، سنبل افشان دير يا زلف پريشاني
بو داغلارين اولدوق بيز فرهاديله شيريني
ساقي المي دوتسا وصله يئتيرم يوخسا
بدبخت و گوني قاره ، بو عاشق آواره
چوخ دانلاما قوي گئتسين،بختي بئله دير نئتسين

 

دونيا منه اوز قويدو هنگامه و غوغاسي
اول غمزه ي جادوسي ، اول نرگس شهلاسي
قيلدي مني بو شهرين ، ديوانه و رسواسي
اول ، سرو خرامان دير يا قامت رعناسي
بو چؤللرين اولدوق بيز مجنونيله ليلاسي
يوخ فاييده سي شخصين ، اؤز سعي و تقلاسي
نه آخرت و ديني ، نه ظاهر دونياسي
نوميد دگيل يئتسين فريادينه مولاسي

 

 

 

 

 

 

نوشتن دیدگاه

تصویر امنیتی
تصویر امنیتی جدید

Go to top
saeed_sol@yahoo.com